Tit 2 | DOB | STEP | Ta 'oyo e'ita palupaluna 'ue'itae,

Titus 2

E'ita palupaluna manuna

1 Ta 'oyo e'ita palupaluna 'ue'itae, 2 be 'inapwanao 'ueonadi geya'abo sinumanuma kabaleya bwasi waiwaina 'enega, ta geya'abo siegwausowala besobeso, ta esi Yaubada sida emisa 'ai'aili, ta oboboma be 'alama'i'ita 'ediyega sida maa.

3 Kaiyaleyao wate 'ueonadi be 'idi bubuna ma idi 'amayaba, be geya'abo tomota si'awa'awa to'umaliyedi, be geya'abo oine sinumanuma diidiga, ta 'ilobwenedi be bubuna bobo'ana sie'itaedi iine enatunadaya 'ediya, 4 be 'enega iine nidi mwanediyao ta natudiyao siobobomedi. 5 Ta ma idi 'amayaba ta bubuna 'esasena 'ediyega 'idi anuwao sida 'ita'i'isidi. Wate sida oboboma ta mwanediyao 'enadi sida ematamatanedi, be 'enega Yaubada 'ina ona tomota sida 'amayabe, ta geya'abo si'awa'awa to'umaliye.

6 Tai tubulagalagao 'uguguyadi be 'idi bubuna sida 'ita'i'isidi.

7 Ta 'oyo 'imu bubuna maibo'ana 'ediyega tomota 'ue'itadi be taudi wate sida bubuna bobo'ana, ta ona 'ai'ailega 'ue'ita, be 'enega 'imu bubuna 'imu e'ita 'ilobwene, 8 be 'enega 'imu e'itao geya'abo tomota si'awa'awa kabokaboedi, ta 'imu onao 'adi nono bobo'ana 'enega 'amu talauwalao 'ugie omayamayadi 'idi lo'aegila besobeso 'ediyega.

9 Toguinuwao wate 'ueonadi be 'idi 'inapwanao 'idi loina sida 'amayabedi, ta 'idi guinuwao 'ediyega sida giegwausowalidi, ta geya'abo silogwalogwautoyasa, 10 be geya'abo 'ipwala. Ta esi ma idi 'amayaba 'ai'aila taudi 'ada To'etoseyana Yaubada tetelina sigieapwese, 'idi guinuwa bobo'ana 'enega.

11 Yaubada 'ina oboboma nina ni'atu 'iapwesama tomota 'ada 'etoseyana manuna, 12 ta 'ie'iteda be 'aene bubuna besobeso ta nuwanuwa to'umalidi tada guitoyasedi, ta esi tada miya bubuna bobo'adi ta palupaludi 'ediyega. 13 Gete tuga ma ida gwausowala 'ada To'etoseyana Yesu Keliso taemisena, tauna 'ida Yaubada waiwaina ta ma ina esaesa, 'enega 'ina apwesama manuna tayamwayamwa. 14 Tauna 'itagwalena manuda ga 'imwawasa sabi 'etoseyeda 'ida to'umalina maibo'ana 'ediyega, be 'igie'esaseda, ga 'ana boda 'ena 'isa'uda be 'ina guinuwa bobo'adi 'ediya tagwaunuwa. 15 E'ita getedi 'ue'itaedi tomota 'ediya, ta loina palupaluna 'enega 'uguguyadi be sida bubuna bobo'ana. Geya'abo 'ebweu yaita 'ie'idi'idiyeyo. 1 Pi 2:18v12 1 Yn 2:16; Ep 1:4v13 Pi 3:20v14 1 Pi 2:9; Ep 2:10v15 1 Ti 4:12